5年前ECHOES90 嘅Dale由美國回流後，一直幫忙打理家族嘅餐飲生意，每日嘅晏晝到午夜，都會喺餐廳見到Dale既身影。

或者係因為佢從事餐飲嘅經驗，令佢感受到美食係維繫人與人之間連繫不可或缺嘅元素，甚至可以療癒人心。

自從Dale投身社會，幫忙經營餐廳後，開始發覺香港人食飯文化非常趕急，限時之餘，一餐食落嘅洗費高昂，佢亦慢慢明白到香港扭曲嘅租金水平已經不知不覺地剝奪咗好多人享受美食嘅權利。

再者，食客非但冇得到應有嘅待遇之餘，同時餐廳亦面臨租金成本問題而「為做生意而做」。昔日「美食之都」嘅美譽放眼現今香港，根本判若雲泥。

2021年，無數餐廳都不得不向現實低頭，紛紛進入倒數狀態，佢哋亦唔例外，前路茫茫。然而，三十而立嘅Dale不禁重新思考，應要以點樣嘅形式將家人15年多嘅心血延續。

經深思熟慮後，2021年6月，佢聯同幾位舊同學正式創立ECHOES90，因為美食係如此重要，不容放棄。

ECHOES90嘅理念係餐廳美食帶入袋，希望無論忙到幾夜、無地方聚會、受環境阻礙而無法享受美食嘅人，都可以擁有選擇權，無時間地域限制下都享受到美食。佢哋希望成為大家嘅「美食療癒師」，以美食為人帶嚟治癒身心嘅作用。

不過，創業初段真係可以用「一腳踢」嚟形容，因為佢感受到前所未有嘅艱苦，不斷受傷、勞損，亦明白到喺新時代生存唔容易，比起安逸嘅時代更要努力同不斷追求進步。

喺新時代下，每一個香港人每分每秒都經歷住不可避免嘅巨變，所謂時勢造英雄，所有嘅艱難都終將百煉成鋼，相信好多人同佢一樣都感受到香港人嘅堅韌。每一個唔肯放棄嘅香港人，都令佢重新感受到鼓舞同感動。

非常之榮幸可以作為一份子。

Be Pound!