【年輕靚媽創業力推食湯文化,家庭事業兩兼顧幸得客人支持】

【年輕靚媽創業力推食湯文化,家庭事業兩兼顧幸得客人支持】

唔知大家有冇聽過「食湯文化」呢?乜湯唔係用嚟飲架咩,究竟係咩嚟架?不如就等推廣「食湯文化」嘅『What The Soup』創辦人Irene為我哋講解下啦!

「食湯文化」,顧名思義係以湯品作為主食,每一款湯都會比較足料同稠身,令人容易有飽腹感,以營養豐富嘅湯品作為主食可以減輕身體負擔,又吸收到身體所需要嘅營養,因此好適合作為纖體代餐。呢個概念喺香港雖然尚未普及,不過早喺多年前就已經被好多亞洲同西方國家推崇架喇。

嚟到呢度,相信大家都對「食湯文化」有一定嘅認識啦!不過,講到喺香港嘅「食湯文化」,就不得不提湯品品牌『What The Soup』喇。『What The Soup』創立於兩年前嘅疫情高峰期,創辦人Irene曾經從事教育工作,後來成為全職媽媽,直至受到升讀小學嘅仔仔鼓勵去做自己想做嘅嘢。回想起自己作為全職媽媽嘅過程中,因曾受過甲狀腺功能亢進嘅困擾而變得更加注重飲食健康,加上照顧小朋友嘅時候會特別注重食物嘅營養價值,因此佢對一啲美味健康,大人、小朋友同長者都能夠食用嘅包裝食品特別感興趣。

本身就熱衷於烹飪嘅Irene過往去過唔同國家學習料理(如法國、意大利、泰國、日本等),以及喺網上分享食譜同煮食心得,加上佢亦有進修「中醫及營養學」嘅課程。由此受到啟發後嘅佢學以致用,將佢所學習過嘅知識投入自家湯品品牌嘅工作,繼而成立『What The Soup』。

『What The Soup』目前大部分嘅湯品都係以fusion為主,Irene就話希望可以將佢以往喺唔同國家學到嘅烹飪精粹都揉合到湯品當中,例如:港式羅宋湯、日式豚肉味噌湯等。而且每款湯品均有註冊營養師計算卡路里同營養成分,所以每逢大時大節前後作為代餐去代替澱粉質都係個唔錯嘅選擇。

講到創業初期有過嘅困難,Irene就指因為佢冇從事餐飲嘅經驗,由搜羅食材到包裝銷售都由零開始,非常花時間咁靠自己摸索;日間照料家庭,而其餘時間就用作處理公司事務同研發湯品,導致佢真正全力投入工作嘅時間比其他人少,所以時間分配亦係佢面對嘅一大難題。

作為一名全職媽媽同事業女性,Irene對兩者之間如何取得平衡都頗有體會。佢就解釋,雖然明暸市場上嘅急速發展,但佢認為自己既要兼顧事業與家庭,相比起其他人,步伐可能會比較慢,但佢認為慢工出細貨,所以不時做好心理準備同自我開解都可以話係佢工作嘅一部分。

最後,Irene想向一直以嚟都不吝給予意見佢嘅客人表示感激,因為佢哋唔介意支持一個新品牌之餘,亦明白香港製造,加上背後冇大集團支持下嘅小店會經營困難,所以喺產品成本方面都好理解。而且又會特意花時間到市集支持,同佢傾偈甚至私下交流心得意見。因此佢非常感恩有班中意佢嘅產品嘅客人,更希望有朝一日擁有實體店時可以邀請客人相聚一番。

What The Soup - 支持傳送門

translation missing: zh-TW.blogs.article.tags: What The Soup