【專訪——I buy I surprise 】

【專訪——I buy I surprise 】

疫情初期,市面上嘅防疫物資都供應緊張,創辦人Janet一開始只為親朋好友,避免食到炒價而到處搜羅口罩,繼而逐漸擴大生意群,進口一啲香港市面上少見嘅產品。

喺產品方面,Janet搜羅貨品嘅首要準則——非中國貨。佢指出,不少人認為日常生活中,乃至全世界嘅物品,多少都難免係中國製造,但佢就認為只要細心咁搵,實際上有好多產品都唔係完全依賴中國製造,例如:韓國製KF94口罩、美國製消毒用品等。

而價錢方面,佢希望維持以上準則之餘,盡量以一個合理、公道嘅價錢提供俾客人,等佢哋唔洗食炒價。回憶起口罩搶購潮,當時一盒口罩叫價四、五百元,而佢亦唔想食人血饅頭,堅持以成本價賣出。
-

講到創業難題,Janet就話知道當時有好多人失業,亦明白佢哋購買防疫物資預算唔多,為此盡量將運費成本減至最少;加上,基於供應商當地嘅防疫需求同政策,貨品岀口大多都有限,或者有貨期延誤嘅狀況。雖然現時各國陸續有開關嘅消息,但運輸仍然受阻,而且有時供應商方面又會交貨前臨時加價,所以佢哋可謂係承受住貨源同價格上嘅雙重壓力。

所以,Janet鼓勵想創業嘅年輕人,除去資金問題,依家喺香港創業的確係簡單、輕鬆咗,但最重要嘅都係要堅持,創業確實容易,但要持續就必須堅持先能夠成功度過關口,就如香港一樣,只有一路堅持先會看見希望。

同時,藉此機會,Janet想向一路支持佢哋品牌嘅客人致謝,佢知道好多客人都因為堅持唔用中國貨而有少許不便,但好處係透過佢哋品牌嘅平台,認識到唔同嘅同路人,而大家都始終貫徹住一個簡單嘅原則,就係「堅持」。