【專訪——食良】

【專訪——食良】

創辦人「主席」本身係銀行業嘅一員,朝九晚六,收入穩定。投身社會幾年後,想喺空餘時間發展自己感興趣嘅事業,於是就抱住「試下」心態去經營副業。
-

至於點解會選擇主打低卡,而唔係較為熱門又惹味嘅零食,「主席」指,雖然自己有做開gym,不過同時又好為食,為咗維持身材同健康,佢深知兩者唔能夠「共存」。不過,自從佢發掘呢啲好食又唔影響健康嘅零食後就明白「魚與熊掌」真係可以兼得嘅,所以就想同其他有同類煩惱嘅女仔分享。
-

創業至今,「主席」無論正副業都可謂非常忙碌,學佢話齋:閂埋部電腦再開另一部電腦。由處理訂單到包貨、執貨同寄貨都一手包辦,大熱天時又獨自搬運十幾公斤嘅貨。

面對住多到分身不暇嘅工作,佢曾經質疑過自己嘅副業係咪值得,但當收到一啲嚟自患糖尿病、飲食失調同厭食症客人嘅feedback後,佢就感到非常窩心同好有滿足感,客人指小店所賣嘅零食令佢哋有多個選擇,實現「零食自由」,所以希望佢可以一直做落去,先令佢重拾繼續做嘅動力同信心。
-

另外,我哋特別想向各位同路人推薦一款零食,就係佢哋獨家代理Givebox嘅純素百力滋—— lean stick喇!呢款百力滋同所有同一牌子嘅產品一樣,含有素食蛋白,絕對係高蛋白、低碳、無糖架!

最重要嘅係,呢款百力滋係當初「主席」邀請Givebox為香港人而製造嘅。佢提出,港人非常中意食百力滋,無論到泰國旅遊,抑或平時喺超市購物,都唔少得百力滋嘅身影,因此非常希望對方可以利用佢哋嘅技術同配方,製作岀健康又令我哋感到熟悉嘅百力滋。
-

最後,「主席」希望向大眾傳遞「隨遇而安」嘅訊息。身邊唔少人經常向佢請教邊樣應該或唔應該食,以控制體重;而佢就認為,大家唔應該俾固有想法或錯誤觀念限制自己嘅生活。人生漫漫,一切隨心而行就好,即使因為食過一餐「邪惡」食物而後悔,後悔過後食清淡啲或者做運動彌補翻就得,因此唔需要太執著於一堆數字而有負面情緒,得不償失。