【專訪——山浪】

【專訪——山浪】

投身航空業超過15年嘅Nelson,曾走訪過世界各地,發現每個地方都有屬於自己標誌性嘅產物,例如:台灣嘅珍珠奶茶、泰國嘅泰式奶茶。佢不禁反思,究竟有咩可以代表香港架呢?呢個答案喺試過一杯Alex沖嘅奶茶後,就岀現咗喇。對Alex嘅奶茶一試難忘嘅Nelson,決定去學沖奶茶呢一門手藝。至於點解會萌生創業嘅諗法,佢就話想帶俾海外嘅港人一杯靚奶茶之餘,亦希望港人終有一日能夠以港式奶茶作為紀念品送俾外國朋友,順便介紹香港文化。

而正職為會計師嘅Alex就喺2019年一個沖茶比賽中獲獎,亦曾喺馬灣嘅一間café售賣自家品牌奶茶,佢同拍檔Nelson合作創業嘅契機係認為大家都同樣擁有豐富嘅國際視野同經驗,可以為「香港製造」、乃至香港作出貢獻,亦希望能夠令香港人對本土嘢有所驕傲。然而當時有幸得獎,佢就認為係一個好好嘅時機去做翻啲嘢,因此搵嚟認識多年嘅Nelson合作。
-
二人坦言,佢哋嘅創業過程並非有仼何資金同背景嘅支持,面對昂貴鋪租,佢哋決定「反其道而行」,唔做實體店,以「入樽」嘅方式呈現港式奶茶。佢哋認為,其實奶茶文化係「成也茶餐廳,敗也茶餐廳」,因為整個奶茶文化嘅環境被局限於茶餐廳,令人覺得奶茶只適合喺茶餐廳度嘆,從而影響佢哋飲奶茶嘅體驗。另外,亦希望可以打破地域界限,以奶茶為載體,為港人帶嚟新嘅體驗。
-
市場上就有唔同嘅奶茶牌子,被問到佢哋認為「山浪」有咩優勢或特別之處時,兩位就講到,喺2019年前所見嘅奶茶都係岀自茶記,亦從未見過有人帶住奶茶周圍郊遊,又喺唔同嘅場合中留意到只有咖啡、紅酒等嘅飲品,於是令佢哋覺得點解唔可以係奶茶呢?

除此之外,綜觀整體需求,除咗在港人士之外,Alex表示亦有留意到身處海外嘅朋友都有咁嘅需求。佢直言,其實呢種味道同情懷上嘅需求一直存在,而一直都冇人去做嘅原因就係「茶餐廳文化」嘅思想狹窄咗奶茶嘅發展。因此,經過一輪分析後,佢發現精品奶茶係大有發展空間嘅。

而以上嘅觀察所得嘅結論就反映咗喺三大價值到:
①得獎:證明佢哋對產品嘅品質嘅要求,以科學化嘅形式岀品,意思係盡量以數據統一化保證奶茶嘅品質,例如,味道、份量等,而唔係好似以前茶記師傅咁憑感覺同經驗去調製奶茶,務求消費者每次飲用都維持到一樣嘅水準。
② 社會責任:
* 產品包裝注重可持續發展,選用可以回收嘅玻璃樽
* 岀錢岀力進行潔淨回收玻璃樽、同祼買店合作,身體力行咁鼓勵及教育消費者着重環境保護方面嘅責任
* 為有需要人士提供工作機會
③精神:不論係品牌理念、設計美學,定係品質上一直精益求精,追求演變,令品牌保持年輕化。有別於傳統奶茶,佢哋並唔希望好似老一輩咁一個配方做死一世,佢哋希望造岀以傳統奶茶作為基礎,不斷創新求變,從而重新將「香港製造」帶入國際舞台,而自己亦為之驕傲嘅產品。
-
至於兩位創業時嘅困難,二人笑言,最初人手不足,而且所有嘢都秉持住「科學化」,有次遇着一筆大單,因而喺分量調配嘅過程中難免會比較耗時,千算萬算,居然算漏佢哋長期沖茶會體力透支。結果,當時佢哋未能如期交貨,要逐個咁向客户道歉,不過就幸得客戶嘅體諒,因此呢件事就成為二人最難忘嘅事。

經過呢兩三年嘅成長,「山浪」嘅團隊亦隨之形成,Alex同Nelson二人仍然繼續正職副業嘅工作,時間分配同管理上亦較之前容易取得平衡。
-
有關於對香港嘅寄望,佢哋就期望與其他香港
本土品牌共同努力同執着,重塑「香港製造」昔日喺國際舞台嘅輝煌時代,亦都藉着呢個機會,用產品與港人一齊走向國際,成為互相連繫嘅橋梁。

同時,Nelson同Alex亦都想感謝支持「山浪」嘅人,香港係個節奏急促嘅城市,每日都有唔同人事改變或者競爭對手嘅誕生。佢哋對於支持者嘅識貨表示感激,一次又一次回購證明咗對「山浪」嘅信任。最後,希望大家多多支持「香港製造」,將「香港製造」帶到國際。

山浪 MT WAVES - 支持傳送門

translation missing: zh-TW.blogs.article.tags: 山浪 MT WAVES