【專訪——安月堂】

【專訪——安月堂】

「安月堂」堂主Joyce由加拿大回流香港十多年,熱愛美食嘅佢,一直希望追求達到心目中最理想嘅味道。為咗呢個種『本應如此』嘅味道,佢創立咗「安月堂」,聯同拍檔以傳統客家風味製作岀豬腳薑。
-

《好事連連 人人有份 》
豬腳薑係產後婦女嘅必食補品,有調補血氣、祛風散寒、健脾開胃、養血祛瘀嘅功效,除咗健康之外,喺傳統習俗中,每個家庭逢喜事都會煲嚟派俾親朋好友同鄰居。

留意到香港食素文化開始普及,所以佢哋專門製作「素薑醋」,等素食者都可以一同分享到食薑醋嘅喜悅。佢指出,雖然坊間一直都有「素薑醋」嘅產品,但薑醋嘅製作可以有唔同配方同元素,從而衍生出唔同風味。佢哋就決定選擇保有傳統味道之餘,亦使用較創新健康嘅方式同食材烹調,着重口感同時顧及養生。
-

《重視原汁原味 堅持靚料烹煮》
講到特別之處,Joyce就認為佢哋喺市場上嘅特別就係作為一間「小店」。正因為佢哋規模唔大,能夠花時間心機去認識同接觸食材,確保食材質素嘅穩定。就講下豬腳薑嘅基本——豬腳同醋,市面上嘅豬腳薑大多都係用豬手製成,但佢就希望盡量保持豬腳薑嘅原汁原味,而且如果使用豬手,就會令整體肥膩感大增。所以即使豬腳嘅供應量較少,佢哋都堅持使用豬腳;而甜醋,一般都會採用本地品牌,並唔會選擇一啲唔認識嘅品牌。

另外,因為佢哋嘅產量可控性高,所以喺烹調時間同食材嘅精準度都較高,從而成品嘅質素都較有保障。
-

《越困難 越要做》
時光荏苒,「安月堂」成立已有一年幾,對Joyce嚟講最困難嘅就莫過於食材價格浮動嘅問題。佢笑言,食材時平時貴,直程係講求運氣。儘管如此,佢同時亦慶幸喺香港,食材都相對穩定。除此之外,由於小店人手較少,宣傳方面一向都比較缺少,因此更深知產品要靠口碑。
-

《傳遞祝福 分享喜悅 心感榮幸》
被問到有咩說話想同支持「安月堂」嘅客人講,Joyce就表示好多謝客人選擇佢哋嘅產品去慶祝重要時刻。另外,佢亦都非常感激客人俾機會香港小店,佢哋有勇氣嘗試一啲從零開始嘅小眾品牌,同埋領略到產品個中嘅心機。

Joyce明白,客人品嘗產品後,周圍向人推薦同回購並唔係必然,因為會付出成本,但佢哋嗰份推薦嘅力量唔止為佢哋帶嚟口碑,更係一份感動。

安月堂 - 支持傳送門

translation missing: zh-TW.blogs.article.tags: 安月堂