當大家望到呢個封面，眼前呢位笑容和藹、談吐間斯文風趣嘅就係我哋「香港品牌故事」第一集嘅採訪嘉賓——根叔 黃永根👏🏻跟住落嚟，不過就睇下二澳呢個地方同根叔之間有啲咩故事啦！
「踏入二澳嘅契機」
大約喺十年前，根叔都只不過係個平凡嘅打工仔，不過比起繼續索然寡味嘅「社畜」生活，佢大膽決定「裸辭」。然而有日佢遇到位希望喺香港土地進行復耕嘅朋友帶佢去二澳視察環境，喺從未有過耕作經驗嘅情況下，根叔對復耕工作產生興趣，於是同朋友一拍即合，決定留低發展二澳復耕計劃。
「二澳=惡人谷？」
究竟點二澳會被外界稱做「惡人谷」架呢？咁就要由2000年嘅一場誤會講起⋯⋯話說，曾經有一班嚟自外面嘅人士嚟到二澳村種樹，但由於佢哋嘅行為並未事前徵詢村民意見，從而導致雙方爭執，最後事情由村長決定封閉村落，盡量唔同外界接觸收場。
「進行復耕計劃願景」
喺二澳，大約一個世紀前，全盛時期有過千人居住，居民生活主要依山傍水，自給自足。然而百年後嘅今日，二澳村早已荒廢，於是團隊更希望重現昔日面貌之餘，重新帶動二澳社區經濟。
「選擇二澳嘅原因」
根叔提出咗「耕種三要事」：足夠嘅水源、較平坦嘅路、少污染嘅環境，而二澳係唯一滿足所有條件嘅地方。另外，由於現時二澳村已經無人居住，於是佢哋亦同村民達成合作，喺免租金嘅情況下將二澳環境重新打理。
「關於二澳岀產物」
以上提及過，二澳團隊嘅仼務唔單止要復興耕地，另一仼務更係要將二澳社區活化，所以持續嘅收入對佢哋嘅運作嚟講都頗為重要。除咗進行耕種工作外，團隊更會定期舉辦生態、體驗活動、導賞團等，亦會將耕種所得嘅收成以「二澳農作社」嘅產品賣出。
佢哋嘅產品除咗農產品之外，更會自家製產品（e.g.菜乾、菜脯、醬料），又或者聯同其他品牌crossover推出產品，可以話係非常多元化。
「價值與社會責任」
作為一間社企，二澳團隊喺社會責任嘅層面上所針對嘅係「保育」一環，同時亦係整個「二澳農作社」嘅核心價值。佢哋一方面希望能夠喺「生態教育」同「食物教育」上提供另類嘅體驗，例如動植物知識、食物嘅營養或耕種過程等；另一方面，佢哋意識到都市人需要一個
大自然環境休息，而二澳正正有咁嘅作用，所以佢哋都有導宿團嘅提供。
十年光陰，汗水揮灑喺呢片名為「二澳」嘅土地，由零變一，雖然中間有被質疑過，由一開始被問「啲地幾時起樓？」到依家「你哋啲蘿蔔幾時收得？」「你哋啲米種得好好食喎！」，根叔用時間證明，人貴在堅持，而呢份堅持實在令人動容。講就容易，做就難，佢正正係我哋呢班後輩需要學習嘅地方。