【唔做「政治正確」素食者 推革命性Eat Clean殺出個血路】

【唔做「政治正確」素食者 推革命性Eat Clean殺出個血路】

「素食並非一種盲目嘅追求」—— 呢個係「That’s it 純粹食所」嘅90後店主兼料理長黎喬帶俾小編嘅一個體會。

自接觸素食健身後黎喬就察覺到,坊間甚少「素食友善」嘅選擇,令許多奉行「素食主義」嘅人士外出食飯時只能夠揀一啲重油重鹽又多添加劑嘅非肉類食品,然而係同「健身」嘅概念背道而馳。有見及此,佢就希望透過創業,嘗試製作高營養嘅素食品,從而為注重健康嘅素食者帶嚟更友善嘅環境。

「That’s it」嘅前身「That’s it Vegan」係由私房菜形式咁做起嘅,到後期先創立品牌。黎喬直言,雖然自己平時中意煮嘢食,但始終擔心「自己煮自己食」同煮俾客人食會有落差,畢竟客人口味各有不同。不過,幸而不時獲得客人嘅意見同提點,佢逐漸料理岀令客人滿意嘅味道之餘,自己亦都煮得開心。除此之外,喺創業嘅過程中,有幸仲有一班前輩同行家嘅不吝教導,先令佢喺一次又一次嘅失敗同嘗試當中鑽研岀理想嘅味道。

依家素食主義市場上嘅產品五花八門,當被問到「That’s it」嘅產品何以別具一格,_就表示比起素食,佢哋嘅品牌係較為推崇「Eat clean」(純粹飲食)。實際上,喺創業前期,黎喬就認為應該要俾客人試多啲純素菜色;後來隨住店舖搬遷,心態改變後,佢就決定主打eat clean,而係咪素食其實都唔太重要。佢補充,雖則就咁聽落看似矛盾,但諗深一層,當一個人食緊炸薯條,雖然係茹素,但方式就不甚健康,如果持續咁食落去,又係咪真係值得以健康作為代價呢?於是,就啟發到佢去行eat clean嘅路線。

作為一間目前只有純素產品嘅品牌,係咪就代表佢哋會以「純素」去標籤自己呢?黎喬就話,其實只係咁啱目前岀嘅都係素食產品嚟,佢哋唔希望只有素食者先有eat clean嘅觀念,同時亦提到『素食』唔應該只流行於自己嘅圈子中,普羅大眾都應該嘗試推行。然而,「That’s it」目前9成客人都係非素食者,佢哋嘅eat clean模式之所以能夠吸引咁多非素食者幫襯,主要因為佢哋採用高養分嘅原材料製作食物,即是話就算客人食緊嘅係一個brownie,都係一個食完都唔會有罪惡感而且有營養嘅brownie。

最後,佢都想呼籲翻香港人多注重自己嘅飲食,畢竟人嘅飲食習慣係會反映翻喺自己身上;同埋就想多謝客人視「That’s it」為佢哋嘅選擇,仲會介紹俾身邊嘅朋友,例如想增肌減脂嘅人,仲有因為糖尿病而好耐冇享用過甜品嘅老人家,呢樣正正係「That’s it」所帶嚟嘅意義。